Стэнфордын их сургуулийн доктор Дашдоржийн Наранбаатар АНУ-д дэлхийн эрдэмтэдтэй мөр зэрэгцэн ажиллаж байгаа билээ. Тэрээр хорт хавдарын эсрэг эм гаргахад оролцсон гадаад эрдэмтэн бөгөөд Монгол Улсаас уригдаж залагддаг нэгэн юм. Д.Наранбаатар хорт хавдарын эсрэг эм тариаг Монгол руу үнэ төлбөргүй оруулж ирэх ажлыг олонтаа зохион байгуулж байсан түүхтэй. Тэрээр 5000 эрүүл мэндийн ажилтнуудад элэгний В,С вирусний эсрэг үнэ төлбөргүй вакцин хийлгэж байв. Энэхүү вакцин нь Монгол Улсад ширхэг нь 900 ам.доллараар зарагдаж байсан байдаг.
Сүүлийн хэдэн жил Д.Наранбаатар АНУ-д ажиллаж амьдарч үе үе лайв хийн Монголчуудад зөвлөгөө өгдөг, шинэ нээлтийн мэдээлэл дамжуулдаг. Хамгийн сүүлд гэхэд Коронавирусийн мөн чанар эмчилгээний аргууд, хөл хорионы үеэр гардаг алдаанууд, ахиц дэвшил зэргийг өргөн дэлгэр бичиж Монгол Улсын Шадар сайд Я.Содбаатарт хүргүүлжээ. Доктор Д.Наранбаатар Оксфордын их сургуулийн эрдэмтэдтэй хамтарч хорт хавдрыг эм тариаг гаргахаар олон жил ажиллаж үр дүнтэй гаргаж байгаа юм билээ. Үүний хажуугаар Коронавирусийн эсрэг вакцин гаргах Оксфордын Их сургуулийн багт ажиллаж байна.
Их сургуулийн баг гэхээр сургалтын төлбөр нэхсэн МУИС-ийн багш гэж төсөөлж болохгүй. Оксфордын дэргэдэх эрдэм шинжилгээний хүрээлэнгээс Нобелийн шагналтнууд, дэлхийн нээлтүүд гардаг “Баянбүрд” юм. Эндээс гарсан санаанууд, томъёонууд, үзэл санааг Дэлхийн том эмийн үйлдвэрүүд, санхүүжүүлэгч нар амаа ангайгаад хүлээж байдаг юм билээ. Тэр том “Баянбүрд”-эд хүлээн зөвшөөрдөгдсөн их эрдэмтэн Д.Наранбаатар маань, тэдний баг Коронавирусийн эсрэг маш өндөр чанартай вакцин гаргаж авснаа зарлалаа.
Энэ вакцины талаар дэлхийн эрдэмтэд шуугиж вакцин үйлдвэрлэгчид, хөрөнгө оруулагчид учраа олохгүй болсон талаар АНУ-ын гол хэвлэлүүд бичиж байна. Монголын эрдэмтэд гэх нөхдүүд улс төрийн хэрүүл, маск ярьж байхад Д.Наранбаатар вакцин хийчихээд зогсож байна. Доктор Д.Наранбаатар Улаанбаатар хотын удирдлагатай хамтарч ажилладаг, ирэх болгондоо лекц уншдаг, тодорхой санал хүсэлтүүд өгдөг юм. Эх орноо гэсэн элэгтэй, гүйгүүл адуу шиг гүйгээд ирдэг энэ эрдэмтнээс асуух тодруулах зөвлөгөө авах цаг болсон. Алийн болгон Амбасэлмээ гуайн үгээр явах вэ.
